ادبی اوتوروم، اردبیل، 1388.7.23

 

مین بیر گئجه: مهر آیی­نین ایگیرمی اوچونده، اوتوزا یاخین اردبیللی شاعیر یازیچی­نین قاتیلماسییلا بیرگه، سایین­لار حامد احمدی، محمود مهدوی و وحید علیرضایی­نین چیخیش­لارییلا، رضا کاظمی­نین "لاپ او اوزاق­لاردا" باشلیقلی کیتابی­نین تنقید اوتورومو، بو شهرین "هنری حوزه­سی­"نین ییغیناجاق سالونوندا کئچیریلدی. جناب­لار حسن صیقلی، محمود مهدوی، حامد احمدی، جعفر بزرگ­امین (یارین)، علی نوری، بولود مرادی، حسن فیضی و وحید علیرضایی­­نین قاباقجادان یازیلمیش تنقیدلری اؤزَل بیر کیتابچا کیمی یاییلدیسا دا، حؤرمتلی ساسان ناطق آپاریجیلیق ائده­رک، اؤیکو توپلوسویلا باغلی یئنی­جه یازیلمیش سایین­لار ربابه قلی­زاده، ناصر کرامتی و آیدین ضیایی­نین ده باخیش­لاری تریبون آرخاسیندان اوخوندو. (کیتابچادا گئدن تنقیدلری، "مین بیر گئجه"­نین "مؤوضوع اوزره آرشیو"ـینین "تنقید" آدلی بؤلوموندن الده ائده بیلَرسینیز. او بیری یئنی یازی­لار دا، سایین ابراهیم عادل­نیا و سایین مهدی نظری­نین تنقیدلرییله یاناشی، گئتدیکجه ائله بو وئبلاقدان یاییملاناجاق­دیر.)    

دئمه­لی، اوتورومون یازیچی قوناغی تبریزدن چاغیریلمیش حامد احمدی جنابلاری ایدی.                                                            

بایراملیق

 

"سعید" داداشی بیر ایکی گون بایراما قالمیش گؤردوم؛ همیشه­کی کیمی کیتابلا دولو چانتاسییلا. بو ایلین ده ایلک بایراملیغینی "سعید موغانلی"ـدان آلدیم... یاشماق و گونش درگی­لری­نین لاپ یئنی نؤمره­لرییله "ویلیام شکسپییر"ـین هاملئت آدلی پییئسینی. آنا دیلیمیزده یاییملانان قزئت­لر، درگی­لر و کیتاب­لار همیشه من اوچون ان گؤزل بایراملیق­لار اولموشلار. بونا گؤره ده، سئودیییم هر کسه اؤز سئوگیمله سایغی­لاریمین دَرین­لییینی آنلاتماق اوچون اونلاری آلیب هدیه وئرمکدن باشقا آیری بیر یول تانیمیرام. بایرامینیز موبارک اولسون!

 

کیتابلار کیتابی 1387

 

سون بئش ایلده آذربایجانیمیزدا یاییملانمیش سئچگین کیتاب­لار؛

کیتاب­لار کیتابی آدلی کیتاب سئچیمی­­نین بیرینجی دؤورو سونوجلاندی ...

 

 تیکله­یین لوطفن:http://kitabsech.blogfa.com/post-6.aspx

 

"بیرلیک" درگیسینین دؤردونجو ساییسی یاییملاندی!

مین بیر گئجه: مین اوچ­یوز سکسان آلتیدا اینترنت اوزره و اؤیکو قولوندا کئچیریلمیش سونای اؤدولونون سئچیلمیش حیکایه­لریندن اولوشان بیرلیک اؤیرنجی درگیسی­نین دؤردونجو ساییسی یاییملاندی. تئهرانین عللامه بیلیم­یوردوندان یاییملانان بو درگی­نین باش­یازاری گنج اؤیکوموزون قوجامان یازیچیسی سایین حامد احمدی اولاراق، بیر چوخ یازیچی­لاریمیزین آدینی دا امکداش­لار قروپوندا گؤرمک اولار. بیرلیکـین بو ساییسینی چیخارانلارا، اؤزللیک­له سایین حامد احمدی، سایین سعید موغانلی و سایین مهیار علیزاده (آیخان)ـا یورولمایاسینیز دئیه­رک، اونون اوخوماغینی اؤیکویله ماراقلانان بوتون دوست­لاریما اؤنری وئریرم... الدن وئرمه­یین، لوطفن! 

        

"غزه"ـده باشقا بیر "خوجالی" یارانماقدادیر!

"هاوا قورشون کیمی آغیر/ باغیر/ باغیر/ باغیر... "

 

 Free Qazze! 

یئنی نسیل، یئنی ایز (محمد صبحدل)/ 1

 

ادبییات، هر ندن اؤنجه!

دانیشیغی آپاران: رضا کاظمی

 

مین بیر گئجه: محمد صبحدل (اورمو، 1356). بیلیم­یورددا الكتروتكنيك قولوندا تحصیل آلمیش، اورمو شهری­نین بوتا آدلی گنج يازيچي­لار اوجاغي­نين قوروجولاريندان بیری­دیر. یاشام­يولداشي فاطيمه ميرحسن­پورـلا بيرليكده، ايرانين شرق بؤلومونده بيرينجي توركجه اؤيرنجي درگیسي ساييلان اولدوز نشرییه­سینی بوراخميشدیر. ها بئله، آذربايجان حيكايه­لري باشلیقلی كيتابيني (ايكي جيلدده)، یاشام­یولداشی­نین امکداشلیغی ایله چاپ ائتدیرمیشدیر. اورمودا «حوزه­ي هنري»ـده، «بوتا يازيچي­لار اوجاغي»ـندا، «خانه­ي تشكل­هاي غير دولتي» و «خانه­ي جوان»ـدا تحكييه ادبيياتيیلا باغلی دؤوري كيلاس­لاردا درس دئميشدیر. بو وئبلاقین بیزیم اؤیکو بؤلومونون ایگیرمی­ بیرینجی حیکایه­سی اونون قلمیندن گئتمیشدیر.

 

بو دانیشیق، یئنی نسیل، یئنی ایز سیرا دانیشیق­لاری آردیندا گئدیر (یئنی نسیل، یئنی ایز ۶). بورادا، سایین محمود مهدوی­نین ایش بیرلیییندن اؤز تشککورمون بیلیندیرمه­یینی گرکلی گؤرورم.    

                                        دانیشیغین بیرینجی بؤلومو

 

ـ بیزیم تحکيیه ادبییاتیمیز، شرق ادبییاتین دامغاسی آلنیندا ایکن دونیایا سؤیله­یه بیله­جک هانسی سؤزلری اورتایا قویماقدادیر؟

: باخين! تحكييه ادبیياتي، چوخ جهتلي، نئچه قاتلي و اينسان درين­ليك­لري­نين ال چاتماز يئرلرينده سئير ائده بيلن بير فئنومئن­دير. بو سؤزله، بو اؤزلليیي صنعت (هنر) و يا ادبيیاتين باشقا ‍ژانرلاريندان آلماق ايسته­ميرم. بير شاعير كيمي، شئعرده ده، بو اؤزللييين اولماسينا اينانيرام. آنجاق بو خصيصه­لر، ائپيك ادبيیاتدا داها اؤزل يئر توتور. بير يئرده تحكييه­ني اينسان روحوندا آرديجيل بير آختاريش آدلانديرميشديم. هله ده بئله دوشونورم و تحكييه تحوولاتيني اينسان فئنومئنينه اولان باخيش­لارين نئجه­ليك­لرينده ايزله­مه­يي اساس توتورام. بو اونو دئمك­دير كي، بيزيم دونيايا، اونون قورولوشونا و بو قورولوش­لارين يئگانه آلينما عاميلي يعني اينسانا و داها عئيني دانيشساق، اينسان شوعورونا موناسيبتيميز نئجه­ديرسه، تحكييه­ميزين جينسي ده عئيني جينسدن اولاجاقدير. بو سؤزون تصديقينده بوتون كلاسيك تحكييه­ميز، مودئرن تحكييه­ميز، فولكلوروموز و بديعي متن­لريميز دايانير.

آذربايجان مودئرن تحكييه ادبيیاتي­نين كؤك­لري اون­دوققوزونجو عصرده باغلانسا دا، مودئرن تحكييه­نين كؤك­لري غربده دايانير. يعني بيز، غرب مدنييتي، تاريخي و ضرورت­لريندن سؤز آچماميش، روماندان، پووئستدن، حيكايه­دن و حتتا دراماتورگييانين اوچ اساسي قولو فاجيعه، درام و كومئدييادان دانيشا بيلمه­ريك. آمما هر حالدا، بو تحكييه­نين بيزيمكي اولماسي و بيزيم دامغايلا تانينماسي دانيلمازدير. غرب تحكييه­سي شرق مدنييتي ايله ديالئكتيكه گيريشميشدير. (سؤزوموزون تحكييه اوزره گئتمه­سي اوچون صيرف تحكييه­دن دانيشيرام.) «خورخه لوئیس بورخئس»ـی نظرده توتاق؛ اونون يازديغي ژانر، غربلي بير ژانر اولسا دا، روايتي­نين جينسي شرقلي­دير و يا خود «اورهان پاموك»ـون بوتون ايش­لري، اؤزلليك­له «منيم آديم قيرميزي» روماني، شرقلي بير روايت اولسا دا، غربي جينسي واردير. البتته بونا رومانين ايستانبولدا، يعني شرقله غربين آيريلدیغی، عئيني حالدا دا ياپيشدیغی یئرده يارانماسي، يئني توركييه­نين غرب ايله موناسيبتلري و يوزلرجه آيري آيري عاميل­لرله ده داها دقيق ياناشماق اولار. سؤز خاص اثر اوزره دئييل. غرب روايته دقيق­ليك، عئيني­ليك و اوبراز درين­لييينه دالماق ايمكان­لاريني گتيرسه­ ده، شرق روايتدن حظ آلما يول­لاري و روايت قات­لاري آراسيندا سئحيرلي و ايشراقي بير آتموسفئرين نئجه يارانا بيلمه سيررلريني تاپميشدير.

 بورادا شرق و غرب دئديييميز سؤزلر، جوغرافييا اوزره دئییل، مدنيیت اوزره آنلام داشييیر. يعني آفريقاني دا، آسيياني دا، گونئي آمئريكاني دا و حتتا آمئريكانين قيزيل­دري­لري­نين اسكي مدنييتيني ده شرقلي سايماق اولار. البتته اونلاردا غربلي ايزلري ده بولماق چوخ چتين دئييل. مسله همان «نيچه»­نين «تراژدي دوغوشو» آدلي اثرينده دئديیي «دئونيزوسي» روحون «آپولويي» روح ايله اوزلشمه­سي­دير. غربين «آپولويي» روحو، شرقين دئونيزوسي روحويلا تركيبه گيريشيب، بوگونكو اينسانين مدنييتيني يارادير. سؤزون دوغروسو بو كي؛ بيز داها هئچ­واخت خاليص شرقلي و يا خاليص غربلي اولا بيلمه­يه­جه­ييك. نه بيز، بلكه هئچ كيم دونيادا خاليص شرقلي و يا خاليص غربلي اولا بيلمه­يه­جك. بيزيم شرقلي كؤكوموز واردير و تحكييه تئكنيك­لريني ده بير شرقلي كيمي ائتکي­لنديرميشيك. دونيادا خاص بير تحكييه يارانيب و من بونو «ايشراقي تحكييه» و رومانا گلديكده ایسه «ايشراقي رومان» آدلانديريرام. بلكه ­ده، داها دوزو «تحكييه­ده ايشراقي­ليك» دئمك­دير...

یئنی نسیل، یئنی ایز (محمد صبحدل)/ 2. دانیشیغین قالانی

                                      ... دانیشیغین ایکینجی بؤلومو

 

ـ بورادا نئجه؟! ... بیزیم ادبی گئدیشیمیز بیر نئچه عامیلدن تاثیر آلاراق، باغا سایاغی ایره­لی گئتمکده­دیر. بیر آز گئندن باخاندا، ایرانین تورک ادبییاتی دانیشدیغیمیز مبحث­لرین هئچ بیرییله اوست اوسته دوشمور.­  

: ايراندا گئدن تورك ادبيیاتي حاققيندا دئمه­لي­يم كي؛ مسله­یه نئچه يؤندن ياناشماق اولار. مدني-ايجتيماعي تضييق­لره باخماياراق، ان دانيلماز مسله، ادبي پروسه­سي­نين دايانديريلماماسي­دير. ادبي پروسه ايستر فارسجا، ايستر آنا ديلیمیزده داوام ائتميشدير. (فارسجا دئديييمده فارسجا يازان آذربايجانلي­لارين ادبيیاتيني دئييرم.) سؤز يوخ كي، آنا ديلده يارانان ادبيیاتين ديليميزين اينكيشافي مسئولييتيندن باش قاچيرماماغي، اونو بيزيم بحثيميزين و هر بير جيددي موباحيثه­نين اساس داياناجاغينا چئويره­جكدير. يعني ادبيیاتين اساس ميقياسي ديل­دير. آمما فارسجا يارانمیش آذربايجان ادبيیاتي، او دؤور ضيالي­لاريميزين ياراديجيليغيندا، اساس فايز آلديغي ادبي-فلسفي پروسه­ميزين اؤنملي بير پاييني اؤزونده ساخلاديغي اوچون آراشديريلمالي و موباحيثه­يه قويولمالي­دير.

آنا ديلیمیزه گلديكده، چوخ­لاري­نين سؤیله­دییی کیمی، بو ديلده اولان ايكي ادبيیاتين اولماسينا اينانميرام...

"مین بیر اؤیکو" ادبی یاریشی ـنین پوستری

قرافیست: مهیار علیزاده. آیخان

بو ادبی یاریشلا باغلی داها آرتیق بیلگی الده ائتمک اوچون، آشاغیداکی آدرسی تیکله­یین لوطفن:

WWW.Oykuler.blogfa.com

 

"مین بیر اؤیکو" فئستیوالینین آنیتی

1001 اؤیکو

هو الجمیل

مین بیر اؤیکو فئستیوالی

 

اینترنت اوزره کئچیریله­جک "مین بیر اؤیکو" آدلی ادبی یاریشدا، هر بیر سیاسی باخیشدان اوزاق گزه­رک، یالنیز و یالنیز ادبیاتا دوشونمک مقصدینده­ییک. بو یولو، بوش ال ایله باشلاساق دا، سیزین دولغون یازی­لارینیزا گووَ­نمیشیک. 

"مین بیر اؤیکو" فئستیوالیندا، اؤیکولرین سئچیمینده هانسی سؤزون دئمه­سی نظرده آلینماییب، سؤزون نئجه دئمه­یی اوستون توتولاجاق­دیر. دیل عمومییتده و اؤیکو دیلی (زبان داستانی) اؤزللیکده، هر هانسی یازیچی­نین اثرینی اوخوماقدا اساس فاکت­لاردان بیری ساییلاجاق­دیر. دیل عمومییتده یعنی: اؤیکونون آذربایجان تورکجه­سینده یازیلماسی. دیلیمیزین قورولوشونا اویغون اولان یارادیلیجیق­لار، ان چوخ نؤمره­لری قازاناجاق­لار. بوردا، "یارادیلیجیق" سؤزونو دئدیییمیزده، چاغداش بیر اؤیکونون قایدالاری اساسیندا یازیلمیش اثرلردن دانیشماقداییق. الیمیزه چاتاجاق اثرلر ایچره­سینده، یالنیز، قرامئر باخیمیندان دوزگون­جه­ یازیلمیش یازی­لارا ده­یر وئریلمه­یه­جک­دیر؛ اونلارین چاغداش بیر اؤیکونون اؤزللیک­لرینی داشیدیق­لاری دا، کسکین­له نظرده آلیناجاق­دیر. 

اؤیکو دیلی دئدیییمیزده ایسه اؤیکونون قوللوغوندا اولان دیل مقصددیر. بوردا ادبی دیل دئییل، سؤیلم (روایت)ـین گره­ک­لرینی نظرده آلاراق، حتتا یوزه یوز ادبی دیل ایله ده اوست اوسته دوشمه­ین یازیچی­نین قونداردیغی دیلدن دانیشیریق. اؤیکو دیلی، سؤیلمین دوغما آلینماسیندا بیرینجی رولدا اویناییر.

ژوری هئیت: محمود مهدوی، آتیلا اسکندانی، رضا کاظمی

 

***

ـ "مین بیر اؤیکو" ادبی یاریشی، یالنیز، اؤیکو ساحه­سینده کئچیریله­جک­دیر.

ـ یازیچی هر بیر یاشدا اولورسا اولسون، بو ادبی یاریشا قاتیلماق اوچون سن محدودیتی قویولماییب­دیر.

ـ هر یازیچی ان چوخو ایکی اؤیکو گؤندَره بیلر.

ـ گؤنده­ریله­جک اؤیکولرین بیر یئرده چاپ اولوب اولماماسی اؤنملی دئییل.

ـ یازی­لارین Word  فایلیندا، Tahoma فونتوندا گؤنده­ریلمه­سی اؤنه­ریلیر.

ـ یازیچی­یا عایید اؤزل بیلگی­لر، او جومله­دن آد، سوی آدی، دوغوم ایلی، ایلگی قورماق اوچون تلفون (یوخسا موبایل) نؤمره­سی گره­کلی­دیر. یازیچی­نین قیسا ادبی بیوقرافی­سی بونلارا آرتیلیرسا، داها آرتیق یئرینه دوشر.

ـ اؤیکولر، آذر آیی­نین 10 ـجو گونونه قدَر [e-mail] آدرسینه گؤندَریلمه­لی­دیر. (بو مؤهلت، هئچ بیر شراییطده تمدید اولونمایاجاق­دیر.)

ـ سونوج­لار (نتیجه­لر)، بو ایلین قوربان بایرامیندا، آذر آیی­نین 19 ـجو گونونده Www.Oykuler.blogfa.com بللی اولوناجاق­دیر.

ـ فئستیوالا گؤندَریله­جک اؤیکولرین ایچیندن، ژوری هئیتین نظری ایله اوچ اوستون اؤیکو سئچیله­جک­دیر.

ـ بیرینجی یئری قازانمیش اؤیکونون یازارینا 120000 تومن، ایکینجی­سینه 100000 تومن، اوچونجوسونه ایسه 80000 تومن اؤدول وئریله­جک­دیر. بونلاردان علاوه، سئچیلمیش یازیچی­لارا بورونج تقدیر لؤوحو، بیر ده بیر پارا هنری اثرلر هدیه اولوناجاق­دیر. ­

فیطر بایرامینیز موبارک!

عکس: رضا کاظمی

فیطر بایرامی بوتون موسلمان­لارا، اؤزللیک­له بو وئبلاقین سایین گؤروجولرینه و اوخوجولارینا موبارک اولسون...

"یئنی نسیل، یئنی ایز" سیرا دانیشیقلاریندان، من و "آز یاز"

يئني نسيل، يئني ايز (۲) ـ اؤيكوچو

رضا کاظمی 

گئجه هامی یاتاندان سونرا!

دانیشیغی آپاران: محمود مهدوی

قایناق: http://azyaz.blogfa.com/post-26.aspx

آذیاز: اينترنت اوزره ياييلاجاق «يئني نسيل، يئني ايز» باشليقلي سيرا موصاحيبه‌لرده، چاغداش ادبياتيميزدا چاليشان گنج شاعير و اؤيكوچولرله دانيشيق آپارماغي پلانلاشديرميشيق. بونون بيرينجي شرطي، كيتاب صاحيبي اولماق اولسا دا، منجه آنجاق، آوانقارد بير ادبياتا ماليك اولماق اونون لاپ اؤنملي شرطي‌دير.  بيرينجي دانيشيغيميزي قرافيست «مهيار عليزاده. آيخان»ـلا باشلاديق و اينديسه اؤيكوچو «رضا كاظمي»‌ـنين دانيشيغي سيزين قارشينيزدادير. بو سيرايا قاتيلاجاق آدلارين بير پاراسي بئله اولاجاق‌دير: «نيگار خياوي»، «راسيم قاراجا»، «كيان خياو»، «دومان اردم»، «آيدين آراز»، «سعيد موغانلي»، «مليحه عزيزپور»، «آيدين روشن»، «محمد صبحدل»، «رامين جهانگيرزاده»، «غفور تقي‌اوغلو» و...

ال وئريرسه، سونرالار بو سيرا دانيشيق‌لاري كيتاب شكلينده يايماغا دا دوشونموشم.

*****

  رضا کاظمی، اردبیل، 1356. ژورنالیست، شاعیر و اؤیکوچو. «لاپ او اوزاق­لاردا» آدلی اؤیکو توپلوسو، حئکایه ساحه­سینده اونون بیرینجی تورکجه کیتابی­دیر... 

مهیار علیزاده و آیخان!

مین بیر گئجه: قرافیک یؤنوندن آنا دیلیمیزده یاییملانان قزئت­لریمیزه، درگی­لریمیزه و کیتاب­لاریمیزا یئنی­لیک گتیرمیش قرافیست مهیار علیزاده. آیخان، اینترنت واسیطه­سییله اؤیکوچو محمود مهدوی­نین سورغولارینا جاواب وئرمیشدیر. دوغرودان دا، آز یاز آدلی بالاجا وئبلاقی ایله چوخلو نشریه­لریمیزین ایشینی اؤز اوزه­رینه گؤتورموش محمود دوستوموزون ال­لرینه ساغلیق!

***

منجه کیمسه طراحین الینی آچیق قویماقلا ضرر ائلمز

دانيشيغي آپاران: محمود مهدوي

قایناق: http://azyaz.blogfa.com/post-24.aspx

ایکنا

عکس: رضا کاظمی

يك داستان‌نويس:

آگاهی عميق از مفاهيم اسلامی پيش‌شرط توليد آثار ادبی موفق ايرانی است

قایناق: http://www.iqna.ir/fa/news_detail.php?ProdID=273005

 

خبرگزاری قرآنی ایران، ایکنا، گروه ادب: اگر خاستگاه شخصيت‌های داستانی ما جامعه‌ای دينی باشد، به عنوان يك داستان‌نويس ضروری است آگاهی عميقی نسبت به مفاهيم آن دين داشته باشيم و به همين علت شناخت كامل از مفاهيم اسلامی پيش‌شرط توليد يك اثر ادبی موفق ايرانی است.

«رضا كاظمی»، داستان‌نويس در گفت‌و‌گو با خبرگزاری قرآنی ايران (ايكنا) با بيان مطلب فوق افزود: فرهنگ و تمدن ]اسلامی[ از اركان بسيار مهم زندگی فرهنگی، اجتماعی و سياسی ما به حساب می‌آيد و دين شاخص‌ترين عنصر هويت ايرانی است. نويسنده­ی يك جامعه­ی دينی نيز اگر بخواهد در آثار خود از مردم سرزمينش سخن بگويد، ناچار بايد از آبشخور اصلی فرهنگ ملتش شناختی عميق به دست آورده ‌باشد.

اين داستان‌نويس كه آثارش را به زبان تركی‌ آذری ]آذربایجانی[ می‌نويسد، تاكيد كرد: يك نويسنده­ی ايرانی چه به زبان فارسی بنويسد و چه به زبان‌های كردی، تركی و ... برای نوشتن ناگزير از مراجعه به فرهنگ ايرانی خود است و فرهنگ‌های ايرانی نیز به ‌رغم تكثر بسيار، از فصل مشترك گسترده‌ای به نام دين اسلام برخوردار هستند كه قرآن سرچشمه پايان‌ناپذير آن به حساب می‌آيد.

نويسنده­ی مجموعه داستان آذری «لاپ او اوزاق‌لاردا» با اشاره به اينكه قصه‌های قرآنی جزو مقوله‌هايی است كه داستان‌نويس مسلمان نمی‌تواند با بی‌اعتنايی از كنار آن بگذرد، تصريح كرد: اغلب قصه‌های قرآنی با زاويه ديد خاصی روايت شده‌اند كه امكان تكرار يا حتی تقليد از آن وجود ندارد و اين زاويه ديد خاص فقط در قالب يك كتاب آسمانی امكان تحقق دارد؛ چرا كه زاويه ديد قصه‌های قرآنی متعلق به دانای كل آن يعنی خدواند يكتاست. 

آفتاب آذربایجان

مین بیر گئجه: آفتاب آذربایجان درگیسی، ایرانین باتی­قوزئیینده یاییملانان چوخ اوخوجوسو اولان نشریه­­لردن بیری­دیر. یازی­لاری ایکی دیلده اولور، آذربایجان تورکجه­سی و فارسجا. من بیلن اوخوجولارین ماراغینی قازانماق، بو درگی­نین اساس آنا خط­لریندن ساییلیر... تورکجه بؤلومونون باش­یازاری سایین سهند نظمی اولاراق، هر ساییدا آیری آیری یازیچی­لاردان و شاعیرلردن مطلب گئدیر. اؤرنک اوچون، یئنیجه یاییملانمیش اون­دوققوزونجو ساییدا (تیر 87) سلیمان جعفری، ثریا قاسم­زاده، ایرج سلمانی، اسماعیل علیقلی­پور، آیناز ستاری­فر، باریش گونئی­داغلی، ملیحه عزیزپور، هادی درخشان، آشیق فرخ مهدی­پور، علی فرهاد، رضا همراز، ساناز اسمعیل­زاده، حسن جمشیدی، جلال روشنی، سلیمان عسگر، ساناز شهابی، حبیب گشتاسب، زهرا نیکروان، آراز فکری، صیاد فیضی، گول­بادام خانیم! و مندن یازی وار. ها بئله، بو سایی­نین "تنه­بی" صحیفه­سینده منله بیر دانیشیق آپاریلمیش­دیر. بیر اوخوجو کیمی، آفتاب آذربایجانـین بوتون امکداش­لارینا یورولمایاسینیز دئیه­رک، چاپ اولونموش بو قیسا موصاحیبه­نی مین بیر گئجه­ـدن ده یاییرام.

***

دانیشیغی آپاران:

سهند نظمی، سلیمان جعفری

آفتاب آذربایجان: هر ندن اؤنجه اؤزونوزو تانیتدیرین؟

ـ من رضا کاظمی...

گؤزوموز آیدین!

بیر ایکی ایل گئجیکدیکدن سونرا، یارپاق قزئتی یئنه ده یاییملاندی... اون­دؤردونجو ساییدا دولغون دوشونجه صحیفه­لریندن علاوه، همیشه­کی کیمی اؤیکو، شعر و پاپلیک یازی­لار دا گئتمیشدیر. بو اؤنملی اولایی، سایین دوکتور ایواز طاها و یارپاغین یئنی امکداش­لارینا تبریک ائدیرم. اوغورلار اولسون!

بو گون، شاعیر دوستوموزون گونو ایدی ...

 

بو گون، شاعیر دوستوموز سایین رامین جهانگیرزاده­نین آد گونو ایدی. بونون بهانه­سییله، یازیچی شاعیر یولداش­لارلا بیرگه بالاجا بیر قوناقلیق یولا سالدیق. آیری آیری رنگ­لرده قوووق آلیب اونلاری ایسه شیشیرتدیک. رامین­ـین باشینا فانتزی بیر پاپاق قویدوق و دالبادال اؤزوموزدن عکس سالدیردیق. یئرینیز بوش، قارین دولو کئیک ده یئدیک، دادلی مئیوه­لر، و دویونجاق دا چای ایچدیک. ماراقلی بوراسی­دیر کی، بوردا دا، رامین یاخامیزدان ال چکمه­ییب بیر قولتوق شعر اوخودو بیزلره! آنجاق ـ کئیک اوستونده­کی شمع­لرین آلووونو پیله­مه­میشدن قاباق، اوخودوغو "یوز اوسته" آدلی شعرین بیر نئچه سطیری داها آرتیق جانیما سیندی. (http://www.cizmaqara.blogfa.com/post-72.aspx)

تانریدان شاعیر دوستوموزا اوغورلار دیله­یرک، بو تئزلییه اونون توی شیرنی­سینی ده یئمه­یی آرزولاییریق. رامین جان، آد گونون موبارک!

 

گؤزوموز آیدین!

یئنی بیر کیتاب

معیار دیل

 ایواز طاهانین معیار دیل آدلی کیتابچاسی ایشیق اؤزو گؤردو. بو اثر تیر آیی‌نین اونوندان هله‌لیک تبریز، تهران و زنجاندا ساتیشدا اولاجاق. موللیف بو کیتابدا معیار دیلین گئرچکلشمه‌سینی انگلله‌ین مانعه‌لری آراشدیریر، بعضی اؤنه‌ری‌لر ایره‌لی سورور. کیچیک حجملی بو کیتابدا آشاغیداکی مؤوضوع‌لار اینجه‌له‌نیر:

 ـ  تاريخي سيناقدان قارماقاريشيق يازي آخين‌لاريناجان

ـ آغيز ديلي و ميللي دوشونوش

ـ معيار ديل و شعريميزين نثره اوستونلويو

ـ يئرلي راديو و تلويزيون‌لارين جالاق دیلی

ـ اينتئرنئت؛ منفي و مثبت ائتکی‌لر

ـ معيار ديل  و چئشيدلي يازي آخيم‌لاري

ـ گراماتيکايا دؤنوش

ـ بيزده ايصطيلاح يوخسوللوغو وار ...

ادبی چالیشمالاریمیز ...

نادر ازهری شعرلرییله تانینیر چوخراق. بو منم چیرکین­لرین بؤیوگو اونون (ایلک) شعر کیتابی­نین آدی­دیر. نادر آنجاق ادبی تنقیدلرله ده ماراقلاندیغیندان، بو ساحه­ده نئچه نئچه یازی­لاری اولموش، آیری آیری نشریه­لرده ایسه اونلاری یایمیشدیر. اونونلا دانیشدیغیم ساعات­لار همیشه من اوچون لذتلی آن­لاریمدان ساییلیر. سون گون­لرده آتاسی­گیلی یوخلاسین دئیه اردبیلده ایدی، او. گؤروش­لریمیزین بیرینده اردبیللی شیخ صفی­نین بقعه­سینه گئدیب اورانین دینج حیه­طینده بیر نئچه ساعات دانیشدیق ادبییات باره­سینده. اونو یایمادیغیما حئیف­لیییم گلن بیر سؤز دئدی ده ادبیاتچی­لاریمیزلا باغلی. ـ "... بیزیم ادبیاتچی­لاریمیزین ادبی چالیشمالاری چوخراق ادبی استمنایا اوخشاییر"، سؤیله­دی شاعیر یولداشیم. بلی، ادبی استمناء! گؤزل تعبیر دئییلدی، بو؟! سیز نئجه دوشونورسونوز؟  

بیر شکیل، بیر خاطیره

شعر قوناقلیغی، اؤیکو قوناقلیغی

سون گون­لرده­کی تعطیلاتدا اؤیکوچو حامد احمدی منه قوناق ایدی، شاعیر دومان اردم ایسه رامین جهانگیرزاده­یه. چوخ­لاری اونو شاعیر کیمی تانییان نادر ازهری ده اؤز آتاسی­گیلی یوخلاسین دئیه ایکی اوچ گون اردبیلده اولاجاقدی تصادوفن. بئله­لیک­له، یازیچی دوستوم محمود مهدوی­نین قاتیلماسییلا بیزیم بیر نئچه ادبی اوتوروم­لاریمیز اولدو. حامد احمدی لپ­تاپ­ـینداکی اؤیکولردن "توتماتورا"، "ایکی دیوار آراسیندا" و "صمدلشمیش مسیح" آدلی اثرلری، دومان اردم "اؤپ اؤلومونو" باشلیقلی کیتابیندان علاوه ازبردن اولان بیر نئچه شعری، من­ (لاپ قیسا شعرلریمی دومان اردم­ـین قولاغینا پیچیلدادیغیملا بیرگه) "اورا آمئریکادیر!" و "یئددینجی بلا" آدیندا اؤیکولری، محمود مهدوی "بئش بارماق" ، "او قیزی آلاندان سونرا..." و "صاباحی یاغیش دئییب..." آدلی حئکایه­لری، و رامین جهانگیرزاده ده بیر نئچه شعر و اونونلا باغلی بیر پارا یازی­لار اوخودو. بو اوخونوش­لارین بیر چوخوندا، نادر ازهری باشدا اولاراق، دوست­لار اؤز تنقیدی باخیش­لارینی آچیقجا سؤیله­ییب، بعضن اثرله باغلی اطرافلی دانیشیق­لار آپاردیلار. بیر ده، گون­اورتالارین بیرینی شاعیر و اؤیکوچو صالح عطایی­نین قوناغی اولاراق (حامد، دومان، رامین، محمود و من)، حامد اوخودوغو اؤیکو و دومان­ـین شعر کیتابییلا باغلی بیر پارا موباحیثه­لر اولوب چئشیدلی دانیشیق­لار گئتدی.

***­

آچیقلاما 1:  نادر ازهری­نین بوتؤلوک­له دونیا ادبیاتی و اؤزللیک­له شرق ادبیاتی اوزره بیر پارا باخیش­لاری، یاخین گله­جکده و ائله بو وئبلاقدا یاییلاجاقدیر...

آچیقلاما 2: فتوشکیلده ساغدان سولا: نادر ازهری، حامد احمدی، رضا کاظمی، دومان اردم، رامین جهانگیرزاده. (اردبیل، یئددی گؤز کؤرپوسو) ـ بو فتوشکیلی یازیچی دوستوموز محمود مهدوی چکمیشدیر.  

 

مهیار علیزاده و آیخان!

اونو چوخ­لاری تانیییر... چوخ­لاری دئدیییم ده ایسه شاعیرلری دئییرم، یازیچی­لاری، ژورنالیست­لری، بیر ده ادبیات­سئورلری. قلم آدامی­دیر، آنجاق شاعیر یوخسا یازیچی دئییل! آدی مهیار، سوی آدی علیزاده، تاخما آدی آیخان.

اونا گؤره یازماق من اوچون چوخ چتین­دیر... ایکی سببدن دولایی. بیرینجیسی اونو برک سئودیییمه گؤره، ایکینجیسی ایسه اونون ایشیندن چوخ باش چیخارمادیغیما گؤره! آنجاق معمولی بیر مخاطب کیمی ایش­لرینه وورغونام. نییه­سینی ده دئیه­جه­یم... (آردی اولاجاق!)

بیرینجی سؤز

 

 

بو توپلوداکی اون اؤیکودن سککیزی، کیتاب شکلینده چاپ اولونمامیشدان اؤنجه آیری آیری درگی­لرده و قزئت­لرده یاییلمیشدیر. دئمک، بونون ان اؤنملی اوستونلویو اوخوجولارلا اکتیو حالتده ایلگی قورماق ایدی. اونلارین چئشیدلی باخیش­لارینی، منفی مثبت تنقیدلرینی و مختلف سؤزلرینی ائشیدیب اوخویاندان سونرا، یازیچی اؤز یازدیغی یازی­لاری­نین اؤزللیک­لرینی داها آرتیق اؤیرنیب اونلاری ایسه قوروماق نییتینده اولور. بیر ده، گؤزوندن یاییندیغی یانلیشلیق­لاری گؤرمک شانصینی دا الدن قاچیرمیر...

بو اوزدن، لاپ او اوزاق­لاردا باشلیقلی اؤیکو توپلوسونون یازیلیشیندا چوخلو اوخوجولارا بورجلو قالیرام. بئله بیر بهانه ایله اونلارین هامیسیندان، و باشدا اولاراق سعید موغانلی، نادر ازهری، صالح عطایی، حسین خوروشی، عباد ممی­زاده (آغداشلی) و اؤزللیک­له ایواز طاها جنابلاریندان اؤز درین سایغی­لاریمی بیلیندیرمه­لی­یم.

اؤیکولرین بیر چوخو، آدلاری آشاغیدا گئدن درگی­لرله قزئت­لرده چاپ اولموشدور. طبیعی، کیتابداکی ائدیت اؤیکولرین سون ائدیتی ساییلیر.

ـ «او ايت بيزه باخيردي» آدلی اؤيكو، آذري درگيسي، دوققوزونجو سايي، 1384 جی ایلین پاييز فصیلی./ رؤیالار ادبی سیته­سی، 1385.

ـ «شكري چوخ‌دور بو قهوه‌نين» آدلی اؤيكو، بلم (اؤیرنجی) درگيسي،‌ آلتينجي و يئددينجي سايي، 1384 جی ایلین آذر و دي آي‌لاري./ رؤیالار ادبی سیته­سی، 1385.

ـ «لاپ او اوزاق‌لاردا» آدلی اؤيكو، ياشماق درگيسي، صيفير ساييسی، 1385 جی ایلین ياز فصیلی. 

ـ «هاف هاف هاف» آدلی اؤيكو، يارپاق قزئتي، اون‌بيرينجي سايي، 1385 جی ایلین خرداد آيي.

ـ «لاپ او اوزاق‌لاردا» آدلی اؤيكو، كتاب شهرزاد درگيسي، دؤردونجو سايي، 1385 جی ایل./ رؤیالار ادبی سیته­سی، 1385.

ـ «گومبول سرباز بوردا کئشیک چکیردی/ اوشاق‌لار، قورغوشون‌لار» آدلی اؤيكو، آذري درگيسي،‌ اون‌اوچونجو سايي، 1385 جی ایلین پاييز فصیلی./ رؤیالار ادبی سیته­سی، 1385.

ـ «غزل دئييل، هاي گلير» آدلی اؤيكو، ياشماق درگيسي، بيرينجي و ايكينجي سايي، 1385 جی ایلین ياي و پاييز فصیل­لری./ رؤیالار ادبی سیته­سی، 1385.

ـ «من‏‏، آتام و هؤرولموش خاطيره‌لر» آدلی اؤيكو، حيدربابا قزئتي، 1386 جی ایل./ بیرلیک (اؤیرنجی) درگیسی، یئنی دؤورون بیرینجی سایی، 1386 جی ایلین دی آیی.

ـ «ایکی خیابان اویانلیق» آدلی اؤیکو، بلم (اؤیرنجی) درگیسی، اون­ایکینجی و اون­اوچونجو سایی، 1386 جی ایلین یاز و یای فصیلی./ آفتاب آذربایجان درگیسی، اون یئددینجی سایی، 1387 جی ایلین اردیبهشت آیی.

 

اؤیکو توپلوسو

تبریز ـ 1387

اختر یایین­ائوی