مین بیر گئجه: نیگار خانیمین بو اؤیکوسویله باغلی اونونلا قونوشدوغومدا، حئکایهنین دیلینه گؤره بیر پارا دانیشیقلاریمیز اولدو. بونا گؤره سونرالیقدا بلکه ده بیر مطلب یازدیم، آیریجا. هر حالدا، بیزیم اؤیکو 10 باشلیغی آلتیندا گئتسین دئیه حئکایهسینی اختیاریمدا قویدوغو اوچون نیگار خاتین خیاوییه اؤز درین سایغیلاریمی بسلهیرک، آشاغیداکی اؤیکونو بیرینجی دؤنه اولاراق، مین بیر گئجهـدن اؤیکویله ماراقلانان اوخوجولارا سونورام. بیزیم اؤیکو بیردن بیزیم اؤیکو اونـا کیمی یاییلمیش اثرلری خاطیرلادیقدا، دئیهسن گئتگئده بیزیم اؤیکو آدلی اؤیکو آنتولوژیسینین فورمالاشماسینا اومید ائتمک اولور... بئله اولسون!
***
اؤزوموز واریق دااا...
نیگار خیاوی
ائودن چیخاندا سحرچاغی گؤزلهدین "سیبلجان" کلیپینی قورتاردي، سورا چیخدين. شالواریوی اوتاقدا گئیيب دویمهلریوي تلسه تلسه گتیریب "سیبلجان"ـین قاباغیندا دویمهلدین. داراغیوی دا جیبونده گتیریب چاللانمیش ساچلاریوی اونون قاباغیندا دارادین. او بیری جیبوندن آتکولون چیخاردیب تزه قیرخدیغین اوزووه، بویون بوغازیوا سپدین. سورا الیوی چکدون بویون بوغازووا. الیوی شالواریوین زیپینهجن ائندیردون. کؤینهییوین دویمهلرینی گؤبهییوهجن آچیب تزهدن دویمهلدون "سیبلجان"ـین قاباغیندا. الیوی شالوار جیبیوه سالیب دهلیز قاپیسینا ساری گئدنده دؤنوب منه باخدون. قاپینی باغلیییب چیخدون. تزهدن قاپینی آچیب سَسیوه قایغیلی هاوا وئریب دئدون:
ـ مامانگیله زادا گئدیسن آپاریم؟
ـ حؤوصلم یوخدو، دئدیم.
مامامگیلی تئز تئز یادیما سالیسان بو گونلر.
*
ناهاردان سورا چکیب کئشنن دالدا باغلادیم ساچلاریمی. اله گلمیردی شووقريب. الوندهکی نایلون قابچاغدان بيغلاریوا رهی یاخا یاخا، ـ چوخداندی دای آرایشگاها زادا گئتمیسن آی آرواد، دئدون.
ـ حؤوصلم یوخدو، دئدیم.
ایستیکانیوی نَلبکییه قویاندا چینی بیر سس داغیلدی اوتاغا.
ایکیمينجی چایی ایچه ایچه، ـ قیزیل گول ایچیریک، چای ایچمیریک کی، دئدون. یئکه درین قورتوملارنان چاييوي هورتيلداتدون. سورا نَلبکینین چینی سسینن آرامیزا گَییردین. گَییرمهن قورتارجاغین اونون هاواسینان، ـ ز َ َ َهریماااار...!، دئدیم اورهییمده. سورا ساچیمدان بیر دستهسینی بارماغیمنان سیغاللییا سیغالليیا ياناغیمین اوسته قیویردیم.
دوروب گئتدون تووالئته. گئديب ایکی بالیش گتیریب یان یانا آتدیم آرایا. اوزو قویلو اوزاندیم. بیر قیچیمی قارنیما ییغدیم، سن تووالئتدن چیخاناجان او بیریسینی ده اوزاتدیم. اوزومو چئویردیم سنون بالیشیوا ساری. اتهییمی چکدیم یوخاریلیق، بودلاریمی تؤکدوم ائشییه. گلدون. اوزاندون. باشیوی بالیشا قویا قویا، ـ آی دده وای ائی ی ی...، دئییب آغیز بورنووو چکیب بوزوشدوردون. یانی چوخ یورغونام، کئفسیزم، دیندیرمهلی دئییلم و بئله بئله سؤزلر. آرخاسی اوسته اوزانیب تاوانا باخدون. ديزيمي بیرآز دا ییغدیم قارنیما و میزیلداناراق، دیلیمین آلتینا بیر ماهنی آلدیم: ـ نينا ناي ناي ناي نيناي... . هله تاوانا باخیردون.
بارماخلاریمي ساليب ساچيمي دارادیم. سورا قولومو قووزاییب هاوادا اَیدیم سنون اوستووه. بارماخلاریمین آرالارینا ایلیشن بیر نئچه تئلیمی گؤزوون قاباغیندا اوینادیب اوینادیب تئللریمی اوچورتدوم اوزووه.
ـ ایشیق چالیر پئنجرهدن گؤزومو قاماشدیریر، دئییب، دالیوی چئویریب بؤیرو اوسته دؤندون.
*
کئچن هفته شاققاناق چکیب ـ دئییر اوغلوم منه آتا دئینده، دئییرم اَده کوپولو! آتان دَییلم اِئي، من داییوام دایین!، دئدون. سورا تومانیوی قارنیوین بوغازینا کیمین چکیب ـ ائووونن مهندیس نوری، بئله شیرین آدامدی اِ اِئي بئله ...، دئییب گئنه شاققاناق چکدون. من دیش ساپینی بارماخلاریما توولایا توولایا دئدیم: ـ وااا... اوندا آروادی دا دئسین، بالا من سنون بیبیوَم ...
ـ دای بیلیسن... زاد اولور دا... نئینهسین. دئییر، الیم آروادیمین بودونا دَینده، ائله بیل اؤز بودوما الیم دَییر.
آخماق آخماق دئدیم: ـ به نییه؟ و سسیمی رئزین کیمی چکیب الیوین یان یؤرهسینهجن اوزاتدیم، ـ او کی آدامین گؤزونه گیریر.
ـ نه بیلیم واللا... اونون دا آروادی سیر صیفتدن دوشوب.
ـ اوغلونون تویوندا ائله گؤزل لزگی اوینوردو كي.
Az tv كاناليندان توركيیه كانالينا چئويريب قيچيوي قيچيوين اوسته آشيردون.
ـ آغاجفرآغانین اییرمی بئش یاشینداکی رشتدهکی تزه آروادی نئینیر؟، سوروشدوم.
ـ مهندیس نوری دئییردی داي بو یانلارا گلمیر. گئدیب شیرکتینه بی شعبه ووروب اورالاردا قالیر ائله.
ـ بس آروادی بوردا...
کسدون سؤزومو، ـ اَه بابا نئینیریک آخی. خاخنان نه ایشیمیز...
*
پالتاریوی دَییشیب اوتاقدان چیخمان اوزون چکدی گئجه ائوه گلدییینده. موبایلووینان اوینایا اوینایا گلیب اوتوردون. تیلویزیونو آچدون؛ دالیجا ماهوارهنی ده آچیب میز اوستوندهکی کیتابی گؤتوروب اونو دا قویدون قاباغیوا. Şu Çılğın Türkler. نئچه آیدی بو کیتاب الونده. تیلویزیون "تاتلیسس" کانالی اوستوندهیدی، سسی ده قیسیق. ـ نه خبرلر؟، دئدیم. گؤزووو کیتابدان آلمادان ـ هئش...، دئدون. بئش اون دَیقه بئلهسینه کئشدی. بیلیردون گؤزومون آلتینا آلمیشام سنی. اونا گؤره کیپریکلریوی داها یاتیردیردون کیتابا. حتتا یوخلامیش کیمی ده گلیردون گؤزومه هردن.
ـ یوخلییبسان؟ وور اخبارا!
دیکسینتیوی تئز گیزلدیب تیلویزیونا باخا باخا، ـ اَهَه...، دئییب دیزون اوسته بوراخیلمیش کنترولو تیلویزیونا ساری توشلادین.
ـ کئشدی اخبار، دئدیم.
ـ یوخ بابا هله.
ـ به سیتاره خانیم درخشیشـه باخمیسان؟
اوزون تیلویزیونا ساری باشیوی توولادون منه و تیهی کیمی بیر گولوشه بنزر سس ده دیشلریوین آراسیندان ائشییه تؤکولدو. ـ سیتارا خانیم اولماسین، لونا خانیم شاد اولسون. شادیلی شاد اولسون...، دئدیم من ده و سنین بایاخکی چیخارتدیغين تيهي كيمي سسدن چیخارتدیم. بیلیردون یاواش یاواش باشلامیشام تلهمی قورماغا. پیس یئرده کاریخدیرمیشدیم. هارا قاچا بیلردون؟ جانیوی نئجه قورتارا بیلردون؟ بیرجه قورتاراجاغین هوپ توتماندایدی. اونو دا كي توتموشدون. بیلیردون من ده احتیاطلی جنهوارام، يئميمي یاخچی تانیرام. سوسوب دینمهدون و بئلهسینه دئییتدشمهیه باشلاماغیمیزین وریانین یئرينده بوغدون.
ـ اوشاخلاردان نه خبر، دانیشیبسان بویون دونن؟
اؤز آرامیزدی اوشاخلار لاپ یئرینده دوشدو یادیوا. ساغ اول، ائله منيم ده داديما چاتدون واختيندا. هئچ منيم اؤزومون ده او ساهات دئییتدشمهيه حؤوصلم يوخئيدي. اولسئیدی باشلاتماسینی یاخشیجا باجاریردیم. تکی هردن بیر، آرادا سنه پورسوق گلیب اَیلنمک ایستیردیم. ایچوندهکی دیکسینتیلریوي دیکسیندیرمک، عصبلریمی دينجلديردي.
ـ هه... ياخجيديلار. ترم امتیحانلاری باشدانیب. باشلاری قالدی. تهرانین دا هاواسی قیزیشیر یاواش یاواش.
بو اوزون جاوابيم یئترلی آرا آشدی بایاخکی آتدان آتدان سویوق ساواشیمیزا. باشیوی کیتابدان قووزویوب منه باخاراق، ـ او قدر باشیما ایش تؤکولوب کی شیرکتده... خارابادا باش قاشیماغا ماجالیم اولمور، دئدون. سورا کنترولو آلیب ماهواره کانالیندا "بی. بی. سی" رادیوسونا چئويردون.