بیزیم اؤیکو 26. (هاوایا پیله ـدیییمیز فاتیحه لر، رضا کاظمی)
مین بیر گئجه: آشاغیداکی اؤیکو، بیرلیک اؤیرنجی درگیسینین دؤردونجو ساییسیندا چاپ اولموشدور...
***
هاوایا پیلهدیییمیز فاتیحهلر
رضا كاظمي
ـ «اورا داها بیز اوچون قوربت دئییل!»، رحمتلیک بؤیوک آتام دئدی.
اونلارين قبيرلري بيزيمكي كيمي دئييل. سيمان بؤلوكلريني يان يانا دوزورلر، مثلن اولور قبير. همي ده، تانيشلارين باشي اوسته فاتيحه وئره وئره بو باشيندان او باشيناجاق گئديب چيخديغيميز اؤز قبريستانلاريميز كيمي دئييل اورا. بهشت زهرا اؤزو اوچون بير شهردير. نئچه نئچه خیياباني وار، بيزيم خیيابانلاريميزين تايي يوخ ها، ائله بيل آسفالتيني گئجهينن گتيريب تؤكولوبلر اورا. بيري تانیمایان اولسا، هئچ يوز ايله ده تاپا بيلمز اؤز آداميني. بير دهنه، ايكي دهنه دئييل، بيزيم شهريميزين آداملاري قدَر قبير داشي وار اوردا. رحمتليك قوتاز بَيين قبرينن خاتينين قبري آراسيندا اوچ خيیابان فاصيله وار. خاتيني باسديراندان سونرا، قوتازين دا تورپاغي اوسته گئديب فاتيحه وئرمك ايستهديك، آنجاق هارا گئدهجك ايديك. دئديلر اونون قبرينی قيز نوهسي ياخشي تانیییر. اوزاقدان ياخيندان گلن قوناقلارين آراسيندا نه قدَر اونو گزديكسه، گئدهني تاپا بيلمهديك. آخيردا، اؤز مشه باياتيميز دئدي، ائله اوزاقدان اوزاغا فاتيحهني اوخويوب هاوايا پيلهسك، يئل اونو آپاريب يئرينه يئتيرهر. بيزسه گؤز ايشلهديكجه بير بيرينين يانينا دوزولموش قبيرلره باخا باخا حمد سورهني اوخويوب پيلهديك. منه ائله گلدي كي، گئجه چؤرهيينه محتاج اولان خئيلك آدامين قونشولوغوندا كاباب بيشيريرم اؤز آداميما. اؤزو ده، قبيرلرين اونوندان دوققوزوندا، اؤلونون شكيليني قويوبلار داشين باش طرفينه. آتا بابالاريميز دوز دئييرميش، آخرالزماندا، عزرائيل قوجالاردان چوخ جاوانلاري خيرتدهلهيهجكميش. جاوانلارين شكيلينه باخاندا، اورهييم توختاييردي بير آز. رحمتليك خاتين آلتميش ايله ياخين ياشادي بو دونيادا. هله تئهرانا كؤچمهميشدن قاباق، قشنگ ياديمدادير، بئل بوخونلو بير قادين ايدي اؤزو اوچون. نئينهيیرسن، قبيره قوياندا، بئلي زادي بوكولموشدو رحمتلييين. قبير ده دئيهنده، ايكي سيمان بؤلويو. هله دئييرديلر بير ايكي طبقه ده اونلارین اوستوندن تيكهجكلر. دؤولتين اليندن هر ايش گلير. اؤزو ده اورا تئهران دئيهرلر، گونده بيليرسن نئچه نفر آدام اؤلور؟ آللاه گؤرستمهسين، ائله ياسلي آدامدير مينيبوس مينيبوس آخيشير بهشتزهرايا. مردهشيرخاناسي نه بويدا اولسا ياخشيدير؟ هاراني دئييم، بيزيم "شهرداری"ـمیز اونون يانيندا هئچ زاددير. جسدي يوماغا وئرمهیه ده نؤوبته دايانماليسان. اوردا هر ايش گؤرمك ايستهسن، آين اوين آلماقدان توت اوتوبوسا مينمهيه كيمي سيرادا دورماليسان. خاتيندان قاباقكي اؤلو پوتا بير كيشي ايدي. اونو آروادينين چادراسينا بوكموشدولر. آداملاري دئييردي قلبي دايانيب بيردن. هئچ بئش دقيقه سوووشماميش، بيزدن سونرا، آيري بير اؤلو ده گتيرديلر. ياهيلماسام، دَده ننهسینین بيرجه اوغلاني ايدي ائله بيل. باجيلاري اؤزونو اؤلدوروردو لاپ. بيري ـ بيلمهديم نهيي ايدي، ايكي يول اورهيي كئچدي او بئله نامحرمين قاباغيندا. گؤزوم اول آخير ائله اوردا دولدو بير آز. آرادا مشه باياتنان چيخديق سيقار چكمهيه. ياريم ساعاتا ياخين اوردا دوردوغوموزدا، اؤلولر ائله بوجور، تسبئح دهنهلري كيمي دوزولوردو بيربيرينين دالييجا. خاتيني اؤز يورغانينا بوكدويوموزه گؤره، اونو اوزاقدان اوزاغا دا يورغانين ايري گوللريندن سئچمک اولوردو. خاتيني يويوب كفنلهينه كيمي، بيز، تزه يونولموش بير قبير داشين اوستونده ايلهشيب سيقار چكديك دالبادال. من بئشيني توستولهديم، سيقار چكمهين مشه بايات دا ايكيسيني. آدينا گؤره، اوستونده ايلهشديييميز قبيرين ايچيندهكي زنن خايلاغي ايدي. نه بيليم بلكه ده قيز ايميش رحمتليك. مردهشيرخانانين او بيري قاپيسيندان، خاتينين تئهرانداكي نوهلري بيزه ال ائلهينده، بيز سيقارلاريميزي سؤندوروب مئییت نامازی قيلماق اوچون دوردوق آیاغا. گئتمهمیشدن قاباق، باياقكي قيزا دا فاتيحه اوخودوق مشه باياتنان. نامازیمیز هئچ بئش دقیقه چکمهدی. پئشناماز نامازي قورتارار - قورتارماز بيزدن پولونو آليب او بيري اؤلونون سوراغينا گئتدي. اؤزو ده بير دهنه، ايكي دهنه يوخ ها، اونون کیمی نئچه نئچه آدام ايشلهيير اوردا. تلم تلهسيك قيلديغي ناماز آنجاق جانيميزا سينمادي اصلن. آللاه خاتينا رحمت ائلهسين، بوردا اؤلسهيدي، اؤز مسجيديميزين ماللاسي جنازهسي اوسته ناماز قيلميشدي ايندي. مئييته بئله ناماز قيلير، آدام دئيير اؤلونو بهشته يولا سالير. اؤلنده ده، آدام اؤز شهرينده اؤلسون! هه، خاتيني چييينيميزه گؤتوروب آمبولانسين ايچينه قويدوق. چوخ آدام گلميشدي، اوزاقدان ياخيندان. بيز اوچ مينيبوسنان جنازهنين دالينا دوشسهك ده، قوهوملارين بير نئچهسي اؤز ماشينلارینان گليرديلر. اينانمازسان، سونسوز آداملارين ياسي كيمي مينيبوسون ايچينده اوخشامادان زاددان خبر يوخ ايدي هئچ. كيشيلي قادينلي، هامي دوز دوز ايلهشيب بؤيروندهكينن پيچيلداشيردي. مينيبوسون هاردا ساخلاديغيني بيلمهديم آخيردا. مردهشيرخانادان ايكي خيیابان اويانليق ايدي، یوخسا اوچ خيیابان؟ ياديمدا قالمادي هئچ. خاتيني باسديريب قاييداندا، قبرينين آدرسيني نوهلرينين بيرينه يازديرديم. باخ، بو داها، قويموشام سيجيلليمين آراسينا. قوتاز بَيين قبيريني آختاراندا، مشه باياتين اوغوللوغو ـ «هئچ اؤز اوشاقلاري ايلده آيدا بير دفعه ده گئتميرلر ددهلري تورپاغي اوسته»، دئدي بيزه. من گؤردوغومو گؤردوم، هئچ كسي قيناماق اولمور. اوردا ائله ائويندن چيخيب قبير اوسته گئتمك اوچون نم نئچه ساعات واخت آييرماليسان. هله قاييتماغين دا قاليب آللاها. تور توستونو دئميرم، خيیابانلاردا بهيم ماشين اليندن ايينه آتماليدير يئره؟ قبرينه نور ياغسين، آخيردا بيلمهديم خاتين نه اوچون بوراني قويدو گئتدي اورا. رحمتليك بير دري اولموشدو، بير سوموك. اوردا نه تئز قوجالارميش آدام. اوستونه يئنه سيمان بؤلويوندن قويدولار. خالا خاطيرين قالماسين دئيه اونون اوستونه ده بير آز ساري تورپاق تؤكدولر. دي قورتاردي گئتدي. هر نه بوللوق اولسا دا، سن دئمه تئهراندا تورپاق قيتليغي وار ايميش. قبريستاندا دا تورپاق تاپيلماسا، داها هئچ زاد. اؤلونون باشينا نئچه اوووج تورپاق سپيب هر نه باشدان اولور اوردا. تورپاق دا دئيهنده، سن تورپاق ائشيت، ساپ ساري قوم گؤر. گلن سئري تئهرانا دؤنسم، بير تورباليق تورپاق گؤتورهجهيم اؤز قبريستانيميزدان. بورانين تورپاغينا كربلا توربهتيندن قاتيبلار. رحمتليك ننهم دئيهردي آلتي دوهيه يوكلهميشديلر توربتلری. اودور بورانين تورپاغيني اووجونا آلاندا، مخصوص بير ايي قالخير اوندان. دئييرلر هركسين كفنينه بير آز كربلا تورپاغيندان قويسان، قبير سيخينتيسيندان قورتارار جنازهسي. ايندي اوردا خاتين يولوموزو گؤزلهيير بيزيم. اؤزو ده خاتيندان سونرا، قوتاز بَيدن سونرا، گؤر نئچهسي بهشت زهراـدا باسديريليبدیر. بو دؤنه سنی ده اؤزومنن آپاراجاغام تئهرانا. سن جاوانسان، قوتاز بَيين ده قبرينين یئرینی تئز اؤيرهنرسن. آماندي، فقط بوردان گؤتورهجهييميز تورپاق ياديندان چيخماسين...
[ به عنوان شهروندی ایرانی که ادبیات تنها دلمشغولیش میباشد، همواره به این جمله کافکا اندیشیده ام که روزی گفته بود: "من فقط ادبیاتم!..." در قالب یک وبلاگ آنهم در حوزه ادبیات داستانی، "مین بیر گئجه" پیش روی شماست. ]